සුවිශේෂී සෞඛ්‍ය ප්‍රතිලාභ දෙන මාළු…

t1

ඉන්දියන් සාගරයෙන් වට වූ අපේ දිවයින මත්ස්‍ය සම්පත් වලින් අනූන වූ තැනකි. රට අභ්‍යන්තරයේ පිහිටි ඇල, දොළ, ගoගා, ජලාශ ඒ මත්ස්‍ය සම්පත තවත් පෝෂණය කරයි. වෙලඳපොලේ ප්‍රධාන ලෙස මුහුදු මාළු සහ වැව් මාළු වශයෙන් විවිධාකාර මාළු වර්ග දක්නට ලැබේ. එමගින් ප්‍රෝටීන, විටමින, ඛණිජලවණ වැනි පෝෂක රැසක් අපේ ආහාර වේලට එක් වේ. ඊට අමතරව මාළු ආහාරයට ගැනීමෙන් විශේෂ සෞඛ්‍ය වාසි රැසක් ද හිමි වේ.

        මාළු වලින් ලැබෙන පෝෂක ගැන අවධානය යොමු කලහොත් එහි ප්‍රධානතම දෙයක් තමයි ප්‍රෝටීන. ශාක ප්‍රෝටීන වලට වඩා සත්ව  ප්‍රෝටීන තත්වයෙන් ඉහලයි. ඉන් අදහස් කළේ සත්ව  ප්‍රෝටීන වල ඇති ඇමයිනො අම්ල අනුපිළිවෙල මානව ප්‍රෝටීන වල ඇති ඇමයිනො අම්ල අනුපිළිවෙලට බොහෝ සමානයි. අත්‍යවශ්‍ය ඇමයිනො අම්ල වලින් සමන්විත මාළු වැඩෙන වියේ සිටින ළමුන්ගේ වර්ධනයට උපකාරි වේ. අනිකුත් මස් වර්ග හා සැසඳීමේදී මාළු වල අඩංගු සම්බන්ධක පටක ප්‍රමාණය අඩු නිසා ජීර්ණය ද පහසු ය.

හුරුල්ලා, සාලයා, සූඬයා, කලවැන්නා, වැනි තෙල් සහිත මසුන් තුල විටමින් A හා විටමින් D බහුලව අන්තර්ගත වන අතර එමගින් මනා සෞඛ්‍යක්  පවත්වා ගැනීමට හේතු වේ. විටමින් A නිරෝගී සමකට හා දෘෂ්ටියකට උපකාරි වන අතර විටමින් D අස්ථි වර්ධනයට උපකාරි වේ.

       යකඩ, අයඩින්, සින්ක්, හා සෙලෙනියම් මත්ස්‍යන්ගේ දැකිය හැකි ප්‍රධාන ඛණිජලවන වන අතර සෝඩියම් ඇත්තේ අඩු ප්‍රමාණයකිනි. සත්වයන්ගේ ඇති යකඩ හීම් යකඩ (Fe2+) ස්වරූපයෙන් ඇති නිසා ඒවා අවශෝෂණය පහසු වේ.යෞවන වියේ පසුවන්නන්ට, ගර්භණී කාන්තාවන්ට , හා වැඩිහිටියන්ට යකඩ ඉතා වැධගත් පෝෂකයකි. එමගින් රතු රුධිර සෛල වර්ධනයට උපකාරි වන අතර රක්තහීනතා තත්ව අඩු කරයි. මාළු යනු වැධගත් අයඩීන් ප්‍රභවයකි. එමගින් ගලගණ්ඩය වැනි තත්ව ඇති වීම වලක්වා තයිරොයිඩ් ග්‍රන්ථියේ මනා ක්‍රියාකාරිත්වයක් පවත්වා ගනී. සින්ක්,සෛල වර්ධනයට හා ප්‍රතිශක්තියට උපකාරි වන අතර සෙලෙනියම් වල ප්‍රති ඔක්සිකාරක හැකියාව නිසා සෛල වලට ඇති වන හානීන් වලක්වයි. හාල්මැස්සන්, කීරමින්, කලවැන්නන් වැනි කුඩා මසුන් ආහාරයට ගැනීමෙන් කැල්සියම් ලැබෙන අතර එය අස්ථි වර්ධනයට උපකාරි වේ.

       මත්ස්‍යයන් තුල සම්තෘප්ත මේද අම්ල අඩු අතර අසම්තෘප්ත මේද අම්ල බහුල ය. ඒ අතර ඔමෙගා  3 මේද අම්ල ප්‍රධාන තැනක් ගන්නේ ඉන් ලැබෙන විශේෂ සෞඛ්‍ය වාසි නිසයි. පර්යේෂණ වලට අනුව ඔමෙගා  3 මේද අම්ල (EPA හා DHA ) මගින් හදවත් රෝග වැළඳීමේ අවධානම අඩු කරයි. එමගින් රුධිර ගත ට්‍රයිග්ලිසරයිඩ (Triglyceride ) ප්‍රමාණය අඩු කරන අතර හිතකර කොලෙස්ටෙරෝල් ( HDL ) ප්‍රමාණය ඉහල නන්වයි. ඔමෙගා  3 මේද අම්ල පෙනීම වර්ධනයට උපකාරි වන බවත් දෘෂ්ටි විතානයේ මනා පැවැත්මට හේතු වන බවත් පර්යේෂණවලින් සොයාගෙන ඇත. කුඩා ළමුන් ගේ මොළය වර්ධනයට ද ඔමෙගා  3 මේද අම්ල උපකාරි වේ. හුරුල්ලන්, සාලයන්, සූඩයන්, හාල්මැස්සන්, තෝරුන් හා කීරමින් වැනි මසුන්ගේ ඔමෙගා  3 මේද අම්ල බහුලව අඩංගු වේ. මිරිදිය මසුන්ගේ ද ඔමෙගා  3 මේද අම්ල දැකිය හැකි අතර ඒ සමඟ ඔමෙගා  6 මේද අම්ල ද අඩංගු වේ. එය මගින් ඔමෙගා 3 හා ඔමෙගා 6 මේද අම්ල නිසි අනුපාතයට නොතිබුණ විට රුධිර නාල වල ප්‍රදාහක තත්ව ඇති කර හැකි නිසා හෘදය හා ඒ ආශ්‍රිත රෝග සඳහා හිතකර නොවේ.

t2

ඔබේ ආහාර වේලටත්  උචිත පරිදි මාළු එක් කරගැනීමෙන් ඉහත සඳහන් පෝෂණ වාසි ලබාගත හැක. අවම වශයෙන් සතියට දෙතුන් වතාවක්වත් මාළු අඩංගු ආහාර වේලක් ගැනීමට උනන්දු වන්න. ආහාර වේලට මාළු තෝරා ගැනීමේදී එකම මාළු වර්ගයක් දිගටම ගැනීම වෙනුවට  විවිධ මාළු වර්ග එක් කරගැනීම සුදුසුය. මිරිදිය මාළු පමනක්  දිගටම ගැනීම වෙනුවට කරදිය මාළු ද ආහාරයට එක් කරගැනීම උචිත ය. මාළු පිසීමේදී ගැඹුරු තෙලේ බැදීම සීමා කිරීම මගින් එහි පෝෂණ තත්වය විනාශ වීම වලක්වා ගතහැක. මිරිසට හා ඇඹුල්තියල් ලෙස ආහාරයට ගැනීම වඩාත් යෝග්‍ය වේ.

Rate this article 1 Star2 Stars3 Stars4 Stars5 Stars (3 votes, average: 5.00 out of 5)

Loading...

Translate »